മുഖങ്ങൾ..

 ചിലർ അങ്ങനെ ആണ്, മുഖങ്ങൾ മാത്രം ആണ്. പക്ഷെ , ഉള്ളിൽ എന്തോ ഒരു  നല്ല പരിചയം തോന്നിക്കുന്ന ചാരുത അവയ്ക്കുണ്ട്. ചിലരുടെ മുഖം മറ്റാരുടെയോ മുഖം ഓർമിപ്പിക്കും. അങ്ങനെ അവർ രണ്ട് പേരും നമുക്ക് പ്രിയപ്പെട്ടവർ ആയി തീരുന്നു. മുഖപുസ്തകം തുറന്നാൽ , വാട്ട്സ്ആപ് തുറന്നാൽ ഒക്കെ ചിലപ്പോൾ അങ്ങനെ ഉള്ള മുഖങ്ങൾ , പേരുകൾ കാണാം. അവരോട് പറയാൻ ഒന്നുമില്ല , പക്ഷെ ആരൊക്കെയോ ആണ് അവർ നമുക്ക്.നമ്മളും ആർക്കൊക്കെയോ സന്തോഷം നൽകുന്ന മുഖത്തിൻ്റെ ഉടമകൾ ആണല്ലോ. നല്ലത്. 

മഴ പെയ്യുമ്പോൾ , യാത്ര ചെയ്യുമ്പോൾ , ഒരു തരം ഗൃഹാതുരത ഗ്രസിക്കുമ്പോൾ ... ഇങ്ങനെ ചില മുഖങ്ങൾ , ചില അനുഭവങ്ങൾ വന്നു പോകും മനസ്സിലെ ചുരം കയറി.  

കണ്ണുകളിൽ വന്നു നിറയുന്ന ചിത്രത്തിൽ വ്യക്തത ഇല്ലെങ്കിലും , മനസ്സിൽ ഉളവാകുന്ന ചിന്തകളിൽ അവർക്ക് മിഴിവേറെ ഉണ്ട്. 

മിഴി രണ്ടിലും നീർ തുള്ളി പോലെ തിളങ്ങുന്ന ഓർമ്മകൾ നൽകുന്ന സൗഹൃദ പക്ഷികൾ വീണ്ടും പറന്നു പോയി ദൂരെ ദേശാടനം നടത്തുവാൻ. തിരികെ മറ്റൊരു നാൾ കൂടണയുവാൻ...